ଟେଡ୍ଏକ୍ସ ଆଇଆଇଏମ୍ ସମ୍ବଲପୁର କାର୍ଯ୍ୟକ୍ରମରେ ବିଭିନ୍ନ କ୍ଷେତ୍ରର ଲିଡର ସଫଳତାର ମନ୍ତ୍ର ବାଂଟିଲେ
ସମ୍ବଲପୁର, ୧୪/୩ (ଉତ୍କଳ ସମାଚାର) (ସରୋଜ ସାହୁ): ପ୍ରମୁଖ ମ୍ୟାନେଜମେଂଟ୍ ଅନୁଷ୍ଠାନ ଆଇଆଇଏମ୍ ସମ୍ବଲପୁର ଭାରତର ବିଭିନ୍ନ ପ୍ରାନ୍ତରୁ ଆସିଥିବା ବିଭିନ୍ନ ଦୂରଦୃଷ୍ଟିସମ୍ପନ୍ନ ବ୍ୟକ୍ତିବିଶେଷଙ୍କୁ ନେଇ ଆୟୋଜିତ ଟେଡ୍ଏକ୍ସ ଟକ୍ ଜରିଆରେ ଛାତ୍ରଛାତ୍ରୀମାନଙ୍କୁ ଜାଗ୍ରତ କରିଛି । ବିଶିଷ୍ଟ ବକ୍ତାମାନେ “ୱାନ୍ ମୋର୍ (ଏସ୍)ମାଇଲ୍\’ ଶୀର୍ଷକ ଅଧୀନରେ ସେମାନଙ୍କର ଦୃଷ୍ଟିକୋଣ ଓ ବୁଝାମଣା ବାଂଟିଥିଲେ । ସେଥିରେ ସେମାନେ ସଫଳତାର ପ୍ରକୃତ ବିଷୟ ଉପରେ ଆଲୋକପାତ କରିଥିଲେ ଏବଂ ଏହାର ନିରନ୍ତର ପ୍ରକ୍ରିୟାକୁ ପ୍ରଶଂସା କରିଥିଲେ ।ଏଥିରେ ସମ୍ବଲପୁରର ପ୍ରମୁଖ ଆୟକର ଆୟୁକ୍ତ ଡ. ସରିତା ମିଶ୍ର କୋଲହେ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ଭିନ୍ନ ଭିନ୍ନ କ୍ଷେତ୍ରର ଦୂରଦୃଷ୍ଟିସମ୍ପନ୍ନ ବ୍ୟକ୍ତିବିଶେଷମାନେ ସେମାନଙ୍କର ଜ୍ଞାନ ଓ ସଫଳତାର ମନ୍ତ୍ର ବାଂଟିଥିଲେ । ସେମାନଙ୍କ ମଧ୍ୟରେ ଥିଲେ ବେଷ୍ଟସେଲର ଲେଖକ ନିଖିଲ ଚାନ୍ଦୱାନୀ; ଦୂରଦର୍ଶୀ ମାର୍କେଟିଂ ଲିଡର ଏବଂ ବ୍ୟବସାୟ ରଣନୀତିଜ୍ଞ ନମିତା ତିୱାରୀ, ମାଷ୍ଟର ଏନଏଲପି ଏବଂ ହିପ୍ନୋଥେରାପି ପ୍ରଶିକ୍ଷକ ମୃଣାଳ ଚକ୍ରବର୍ତୀ, ପ୍ରଖ୍ୟାତ କସ୍ମେଟିକ୍ ସ୍ତ୍ରୀ ରୋଗ ବିଶେଷଜ୍ଞ ଡାକ୍ତର ସୁରକ୍ଷିତ ବଟିନା; ମାର୍କେଟିଂ ଲିଡର ଦେବନ ଭଲ୍ଲା ଏବଂ ଇମାମି ଲିମିଟେଡର ଏଭିପି ଏବଂ ଜଣେ ସାର୍ଟିଫାଏଡ୍ ଇଏସଜି ବିଶେଷଜ୍ଞ ଅଙ୍କୁର ଚତୁର୍ବେଦୀ । ଏହି କାର୍ଯ୍ୟକ୍ରମରେ ଭାରତୀୟ ବରିଷ୍ଠ ଜାତୀୟ ମହିଳା ଫୁଟବଲ ଦଳର ପୂର୍ବତନ ଅଧିନାୟିକା ଶ୍ରଦ୍ଧାଞ୍ଜଳି ସାମନ୍ତରାୟଙ୍କ ଭଳି ବକ୍ତା ମଧ୍ୟ ଯୋଗ ଦେଇଥିଲେ । ଭାରତୀୟ ନୌସେନାର କମାଣ୍ଡର ତଥା ଅସ୍ତ୍ରଶସ୍ତ୍ର ବିଶେଷଜ୍ଞ କମାଣ୍ଡର ରଞ୍ଜନ ଭଟ୍ଟାଚାର୍ଯ୍ୟ ଏବଂ ସଂସଦର ଭବନରେ ଭାଷଣ ଦେଇଥିବା ଓଡ଼ିଶାର ବିଦ୍ୟାର୍ଥୀ ଅନମୋଲ ଅଙ୍କିତା । ଆଇଆଇଏମ୍ ସମ୍ବଲପୁରର ନିର୍ଦେଶକ ମହାଦେବ ଜୟସ୍ୱାଲ କହିଛନ୍ତି ଯେ, “ଟେଡ୍ଏକ୍ସ ଆଇଆଇଏମ ସମ୍ବଳପୁର କେବଳ ଏକ କାର୍ଯ୍ୟକ୍ରମ ନୁହେଁ, ଏହା ହେଉଛି ଏକ ଆକର୍ଷଣୀୟ ଅନୁଭୂତି ଯାହା ଧାରଣାକୁ ଉନ୍ମୋଚନ କରିବା ସହ ମନକୁ ପ୍ରେରଣା ଦେଉଛି ଏବଂ ନବସୃଜନର ଶକ୍ତିକୁ ପାଳନ କରୁଛି । ବିଭିନ୍ନ କ୍ଷେତ୍ରର ବକ୍ତାମାନଙ୍କର ବିବିଧ ଉକ୍ତି ସହିତ ଏହି କାର୍ଯ୍ୟକ୍ରମ ବୌଦ୍ଧିକ ଉତ୍ସୁକତା ଜାଗ୍ରତ କରିଛି ଏବଂ ଛାତ୍ରଛାତ୍ରୀମାନଙ୍କ ମଧ୍ୟରେ ଅର୍ଥପୂର୍ଣ୍ଣ ସମ୍ପର୍କ ସୃଷ୍ଟି କରିଛି । ଏହା ସେମାନଙ୍କୁ ସେମାନଙ୍କର ଦିଗନ୍ତକୁ ବ୍ୟାପକ କରିବାକୁ, ସେମାନଙ୍କର ଧାରଣାକୁ ଚ୍ୟାଲେଞ୍ଜ କରିବା ଏବଂ ଜଟିଳ ପ୍ରସଙ୍ଗଗୁଡ଼ିକର ଅଧିକ ସୂକ୍ଷ୍ମ ବୁଝାମଣା ବିକଶିତ କରିବାକୁ ଉତ୍ସାହିତ କରୁଛି । ଚିନ୍ତାପ୍ରବଣ ଆଲୋଚନାଠାରୁ ଆରମ୍ଭ କରି ନେଟୱାର୍କିଂ ସୁଯୋଗ ପର୍ଯ୍ୟନ୍ତ ଏହା ଏକ ପ୍ଲାଟଫର୍ମ ମଧ୍ୟ ସୃଷ୍ଟି କରିଥିଲା ଯେଉଁଠାରେ ବ୍ୟକ୍ତିମାନେ ଜ୍ଞାନ ବବାଂଟିପାରିବେ, ଧାରଣାକୁ ଚ୍ୟାଲେଞ୍ଜ କରିପାରିବେ ଏବଂ ସକାରାତ୍ମକ ପରିବର୍ତନ ଆଣିଥିବା ପଦକ୍ଷେପ ଉପରେ ସହଯୋଗ କରିପାରିବେ ।’’କାର୍ଯ୍ୟକ୍ରମରେ ଅଧ୍ୟାପକ, କର୍ମଚାରୀ, ନିମନ୍ତ୍ରିତ ଅତିଥି ଓ ଛାତ୍ରଛାତ୍ରୀମାନେ ଉପସ୍ଥିତ ଥିଲେ ।