ରାଉରକେଲା:ବଣାଇଁ ୧୮/୫,(ଉତ୍କଳ ସମାଚାର)ବଣାଇଁ ନିକଟ ବ୍ରାହ୍ମଣୀ ନଦୀରେ ବୁଡ଼ି ନିଖୋଜ ହୋଇଥିବା ଜଣେ ଯୁବକଙ୍କ ମୃତଦେହ ପୋଲିସ ଓ ଅଗ୍ନିଶମ ସେବା କର୍ମଚାରୀଙ୍କ ଦ୍ୱାରା ବ୍ୟାପକ ସନ୍ଧାନ ଅଭିଯାନ ପରେ ରବିବାର ସନ୍ଧ୍ୟାରେ ଉଦ୍ଧାର କରାଯାଇଛି। ମୃତକଙ୍କ ନାମ ଦେବଗଡ଼ ଜିଲ୍ଲାର ପୁରୁଣାପାଣି ପଞ୍ଚାୟତ ଅନ୍ତର୍ଗତ ରତନପାଲି ଗ୍ରାମର ଆଶିଷ ପ୍ରଧାନ ବୋଲି ଚିହ୍ନଟ କରାଯାଇଛି। ସୂଚନା ଅନୁସାରେ, ଘଟଣାଟି ଶନିବାର ଦିନ ବ୍ରାହ୍ମଣୀ ନଦୀ କୂଳରେ ଥିବା ଫରେଷ୍ଟ ନର୍ସରୀ ଅଞ୍ଚଳ ନିକଟରେ ଘଟିଥିଲା। ଘଟଣା ଅନୁସାରେ ଦୁଇଜଣ ଯୁବକ ଗାଧୋଇବା ପାଇଁ ବ୍ରାହ୍ମଣୀ ନଦୀକୁ ଯାଇଥିଲେ। ଗାଧୋଇବା ସମୟରେ, ଉଭୟେ ନଦୀର ପ୍ରବଳ ସ୍ରୋତରେ ଭାସି ଯାଇଥିଲେ ବୋଲି ଜଣାପଡ଼ିଛି। ଘଟଣା ପରେ ଜଣେ ଯୁବକଙ୍କୁ ସ୍ଥାନୀୟ ବାସିନ୍ଦାମାନେ ଉଦ୍ଧାର କରିଥିବା ବେଳେ, ଆର ଜଣକ ଆଶିଷ ନଦୀରେ ନିଖୋଜ ହୋଇ ଯାଇଥିଲେ। ଘଟଣା ପରେ, ବଣାଇଁ ପୋଲିସ ଏବଂ ଅଗ୍ନିଶମ ସେବାର କର୍ମଚାରୀମାନେ ଅଞ୍ଚଳରେ ଏକ ବ୍ୟାପକ ସନ୍ଧାନ ଅଭିଯାନ ଆରମ୍ଭ କରିଥିଲେ। କିଛି ଘଣ୍ଟା ଖୋଜା ଖୋଜି କରିବା ପରେ, ନିଖୋଜ ଯୁବକଙ୍କ ମୃତଦେହ ଶେଷରେ ରବିବାର ସନ୍ଧ୍ୟାରେ ନଦୀରୁ ଉଦ୍ଧାର କରାଯାଇଥିଲା।ସୂଚନା ଅନୁସାରେ ମୃତ ଯୁବକ ବରସୁଆଁର ଏକ ଘରୋଇ କମ୍ପାନୀରେ କାମ କରୁଥିଲେ। ରବିବାର ଛୁଟି ଥିବାରୁ, ଏହି ଦୁଃଖଦ ଘଟଣା ଘଟିବା ପୂର୍ବରୁ ସେ ତାଙ୍କ ସମ୍ପର୍କୀୟମାନଙ୍କୁ ଭେଟିବାକୁ ଆସିଥିଲେ ବୋଲି ଜଣାପଡିଛି। ଯୁବକଙ୍କ ଆକସ୍ମିକ ମୃତ୍ୟୁରେ ତାଙ୍କ ଜନ୍ମମାଟି ଗାଁ ଏବଂ ପରିବାର ସଦସ୍ୟ ତଥା ସମ୍ପର୍କୀୟମାନଙ୍କ ମଧ୍ୟରେ ଶୋକର ଛାୟା ଖେଳିଯାଇଛି।
About the Author
