ରାଉରକେଲା ୨୭/୧୦,(ଉତ୍କଳ ସମାଚାର) ତାମିଲନାଡୁର ଚେନ୍ନାଇସ୍ଥିତ ଜେପିଆର୍ ବିଶ୍ୱବିଦ୍ୟାଳୟ ଠାରେ ୨୦୨୬ ଅକ୍ଟୋବର ୨୮ରୁ ନଭେମ୍ବର ୨ ତାରିଖ ପର୍ଯ୍ୟନ୍ତ ୨୫ତମ ଜୁନିୟର ଜାତୀୟ ଉଶୁ ପ୍ରତିଯୋଗିତା ଆୟୋଜିତ ହେବ ବୋଲି ସୂଚନା ଦେଇଛନ୍ତି ସୁନ୍ଦରଗଡ଼ ଉଶୁ ସଂଘର ସାଧାରଣ ସମ୍ପାଦକ ସୁଜନ ରଥ। ଏହି ଜାତୀୟସ୍ତରୀୟ ପ୍ରତିଯୋଗିତାରେ ଭାଗ ନେବା ପାଇଁ ଓଡ଼ିଶାର ୩୪ ଜଣିଆ ଜୁନିୟର ଉଶୁ ଦଳ ଅକ୍ଟୋବର ୨୬ ତାରିଖ ଦିନ ଭୁବନେଶ୍ୱରରୁ ଚେନ୍ନାଇ ଅଭିମୁଖେ ଯାତ୍ରା କରିଛନ୍ତି। ରାଉରକେଲାର କ୍ରୀଡ଼ା ଉଶୁ ସଂଘ ପକ୍ଷରୁ ୫ ଜଣ ପ୍ରତିଭାବାନ ଖେଳାଳି ଗତକାଲି ସୋମବାର ଦିନ ରାଉରକେଲାରୁ ଯାତ୍ରା କରି ଭୁବନେଶ୍ବରରେ ଓଡ଼ିଶା ଦଳ ସହ ଯୋଗଦେଇଛନ୍ତି। ସେମାନେ ଏହି ଜାତୀୟସ୍ତରୀୟ ପ୍ରତିଯୋଗିତାରେ ନିଜ ନିଜର କ୍ରୀଡ଼ା ଦକ୍ଷତା ପ୍ରଦର୍ଶନ କରିବେ। ସୁନ୍ଦରଗଡ କ୍ରୀଡ଼ା ଉଶୁ ସଂଘର ସଭାପତି ବିରଞ୍ଚି ନାରାୟଣ ପଟ୍ଟନାୟକଙ୍କ ସୂଚନା ଅନୁଯାୟୀ, ମାଷ୍ଟର ଆଦିତ୍ୟ ବେହେରା ୪୮ କିଲୋଗ୍ରାମ ଏବଂ ଅନୁଜ ହେମ୍ବ୍ରମ ୫୬ କିଲୋଗ୍ରାମ ବର୍ଗର ସାଣ୍ଡା ପ୍ରତିଯୋଗିତାରେ ଭାଗ ନେବେ। ସେହିପରି ସାଧନା ମାଝୀ ତାଓଲୁର ନାନ୍ଚୁଆନ୍ ବିଭାଗରେ, ଦିବ୍ୟଜ୍ୟୋତି ବେହେରା ତାଇଚି ବିଭାଗରେ ଏବଂ ଆଦିତ୍ୟ ସିଂ ନାନ୍ଚୁଆନ୍ ଶୈଳୀର ଗ୍ରୁପ୍ ଇଭେଣ୍ଟରେ ଅଂଶଗ୍ରହଣ କରିବେ। ଏହି ଖେଳାଳିମାନଙ୍କୁ ଉତ୍ସାହିତ କରିବା ସହ ସେମାନଙ୍କ ସଫଳତା କାମନା କରିଛନ୍ତି କ୍ରୀଡ଼ା ଓ ସାମାଜିକ କ୍ଷେତ୍ରରେ ପ୍ରତିଷ୍ଠା ଲାଭକରିଥିବା ଅନେକ ବିଶିଷ୍ଟ ବ୍ୟକ୍ତି। ସେମାନଙ୍କ ମଧ୍ୟରେ କ୍ରୀଡ଼ା ଉଶୁ ସଂଘର ଉପସଭାପତି ଟିକା ବାହାଦୁର, ଯୁଗ୍ମ ସମ୍ପାଦକ ଅଜୟ ଲାକ୍ରା, ରାଉରକେଲାର ଉପକ୍ରୀଡ଼ା ନିର୍ଦ୍ଦେଶକ ସୁଦୀପ୍ତ ନାୟକ, ଆର୍ୱାଇଏମ୍ଏ (ରାଇମା)ର ସାଧାରଣ ସମ୍ପାଦକ ବାସୁଦେବ ବାନାର୍ଜୀ, ଜିଲ୍ଲା ଆଥଲେଟିକ୍ ଆସୋସିଏସନ୍ର ସାଧାରଣ ସମ୍ପାଦକ ପ୍ରଭାତ ଭୋଳ ଏବଂ ସମାଜସେବୀ ଓ. ପି. ସିଂହ ପ୍ରମୁଖ ଅଛନ୍ତି। ସେମାନେ ଖେଳାଳିମାନଙ୍କ ଦକ୍ଷତା ଉପରେ ଆସ୍ଥା ପ୍ରକାଶ କରିବା ସହ ଜାତୀୟସ୍ତରରେ ପଦକ ଜିତି ସୁନ୍ଦରଗଡ଼ ଜିଲ୍ଲା ତଥା ଓଡ଼ିଶାର ଗୌରବ ବୃଦ୍ଧି କରିବେ ବୋଲି ଆଶା ପ୍ରକାଶ କରିଛନ୍ତି ସୁନ୍ଦରଗଡ଼ ଉଶୁ ସଂଘର ସାଧାରଣ ସମ୍ପାଦକ ସୁଜନ ରଥ।
About the Author
