୬୮ କିଲୋଗ୍ରାମ ଗଞ୍ଜେଇ ସହିତ 1 ମହିଳାଙ୍କ ସମେତ ୩ ଗିରଫ, ୩ଟି କାର ଓ ୨ଟି ମୋଟରସାଇକେଲ ଜବତ

ସୁନ୍ଦରଗଡ଼,୧୫/୧୦(ଉତ୍କଳ ସମାଚାର):: ସୁନ୍ଦରଗଡ଼ ଟାଉନ୍ ପୋଲିସ ପକ୍ଷରୁ ମଙ୍ଗଳବାର ଦିନ ସେମିନାରୀ ଅଞ୍ଚଳର ଭବାନୀପୁର ସ୍ପୋର୍ଟ୍ସ ହଷ୍ଟେଲ ପଛପଟେ ଥିବା ଏକ ଘରେ ଚଢାଉ କରି ବିପୁଳ ପରିମାଣର ଗଞ୍ଜେଇ ଜବତ କରିଛି। ଏହି ଚଢାଉ ସମୟରେ ପ୍ରାୟ ୬୮ କିଲୋଗ୍ରାମ ଗଞ୍ଜେଇ ଜବତ କରାଯିବା ସହିତ ଜଣେ ମହିଳାଙ୍କ ସମେତ ତିନି ଜଣଙ୍କୁ ଗିରଫ କରାଯାଇଛି।      ପୋଲିସ ସୂତ୍ରରୁ ମିଳିଥିବା ସୂଚନା ଅନୁସାରେ ଗିରଫ ଅଭିଯୁକ୍ତମାନେ ହେଲେ ଜଣେ ମହିଳା ସହଯୋଗୀଙ୍କ ସମେତ କୁତ୍ରା ଥାନା ଅଞ୍ଚଳର ଅଜିତ ଓରାମ (୩୦) ଏବଂ ସନ୍ଦୀପ ଖାଲଖୋ (୩୨) ବୋଲି ଚିହ୍ନଟ କରାଯାଇଛି। ପୋଲିସ ଚୋରା ଗଞ୍ଜେଇ ପରିବହନ ପାଇଁ ବ୍ୟବହୃତ ହେଉଥିବା ପଞ୍ଜିକୃତ ନମ୍ବର ଥିବା (OR 02 AM 7540), (OR 17 P 6812) ଏବଂ (OR 02 PW 8547) ଥିବା ତିନୋଟି କାରକୁ ମଧ୍ୟ ଜବତ କରିଛି।     ସୂଚନା ଅନୁସାରେ ଜିଲ୍ଲାର ବିଭିନ୍ନ ସ୍ଥାନରେ ବଣ୍ଟନ ପାଇଁ ଛୋଟ ପାଉଚରେ ପ୍ୟାକ୍ କରିବା ପାଇଁ ଏହି ତିନି ଜଣ ଗଞ୍ଜେଇ ଘରକୁ ଆଣିଥିଲେ। ସୂଚନା ପାଇ ପୋଲିସ ଘଟଣାସ୍ଥଳରେ ଚଢାଉ କରି ସେମାନଙ୍କୁ ଧରିଥିଲା। ଗଞ୍ଜେଇ ଏବଂ କାର ବ୍ୟତୀତ, ଏକ ମୋଟରସାଇକେଲ (OD 14 AC 2125) ଏବଂ ଏକ ସ୍କୁଟର (OD 16 N 6278) ମଧ୍ୟ ସେହି ସ୍ଥାନରୁ ଜବତ କରାଯାଇଛି।