ରାଉରକେଲା ୧୬/୩,(ଉତ୍କଳ ସମାଚାର) ପାନପୋଷ ରୋଡ ସିଭିଲ୍ ଟାଉନସିପ୍ ଅଞ୍ଚଳରେ ଥିବା ମା ତାରିଣୀ ମନ୍ଦିରର ମା ତାରିଣୀ ପରିଚାଳନା ସମିତିକୁ ରାଜ୍ୟ ସରକାର, ଓଡ଼ିଶା ଧାର୍ମିକ ହିନ୍ଦୁ ଐତିହ୍ୟ ଆଇନ ୧୯୫୧ ଅନୁଯାୟୀ ଓଡ଼ିଶା ରାଜ୍ୟ ସରକାର ଦ୍ୱାରା ହାତକୁ ନିଆଯାଇଛି ବୋଲି ଏହାର ଏକ ସରକାରୀ ଆଦେଶନାମା ଜାରି କରାଯାଇଛି। ସମ୍ବଲପୁରର ଅତିରିକ୍ତ ସହାୟକ ଐତିହ୍ୟ କମିଶନର ୨୦୨୫ ଡିସେମ୍ବର ୬ ତାରିଖରେ ନୂତନ ଟ୍ରଷ୍ଟିଙ୍କ ନିଯୁକ୍ତି ନେଇ ମନ୍ଦିର ସମିତିକୁ ଅବଗତ କରାଇଥିଲେ। ଏଠାରେ ସ୍ମରଣଯୋଗ୍ଯ ଯେ, ମା ତାରିଣୀଙ୍କ ପ୍ରତିମା ୧୯୭୫ ମସିହାରେ ବାବା ଗଙ୍ଗାଧର ଦାସଙ୍କ ଦ୍ୱାରା ସ୍ଥାପନ କରାଯାଇଥିଲା। କିଛି ବର୍ଷ ପରେ ପରବର୍ତ୍ତୀ ସମୟରେ ଭଗବାନ ହନୁମାନଙ୍କ ସମେତ ଶ୍ରୀ ଜଗନ୍ନାଥ ମନ୍ଦିର, ସେହିଭଳି ମା ଲକ୍ଷ୍ମୀ ମନ୍ଦିର ମଧ୍ୟ ନିର୍ମିତ ହୋଇଥିଲା। ପରେ ପରେ କଲ୍ୟାଣ ମଣ୍ଡପ ନିର୍ମାଣ ମଧ୍ଯ ହୋଇଥିଲା। ପ୍ରତିବର୍ଷ ମନ୍ଦିର ପରିସରରେ ଅଷ୍ଟ ପ୍ରହରୀ, ଚୈତ୍ର ମଙ୍ଗଳବାର, ଝାମୁ ଯାତ୍ରା, ଅକ୍ଷୟ ତୃତୀୟା, ରଥଯାତ୍ରା, ନବରାତ୍ର, ଗୀତା ଯଜ୍ଞ ଇତ୍ୟାଦି ଅନେକ କାର୍ଯ୍ୟକ୍ରମ ଅନୁଷ୍ଠିତ ହୋଇଥାଏ । ଗତ ବର୍ଷ ନୂତନ ମା ତାରିଣୀ ମନ୍ଦିରର ପ୍ରତିଷ୍ଠା ନିର୍ମଳ ଚନ୍ଦ୍ର ରାଉତରାୟଙ୍କ ସଭାପତିତ୍ବରେ ଓ ସଦସ୍ୟମାନଙ୍କ ଦ୍ଵାରା କରାଯାଇଥିଲା।ପୂର୍ବରୁ ଥିବା ମା ତାରିଣୀ ମନ୍ଦିର ପରିଚାଳନା କମିଟିକୁ ରାଜ୍ୟ ସରକାର ହାତକୁ ନେବା ପରେ ଏହା ଶ୍ରୀ ମା ତାରିଣୀ ଠାକୁରାଣୀ ଟ୍ରଷ୍ଟ ନାମରେ ପରିଚିତ ହୋଇଛି। ୨୦୨୬ ଜାନୁଆରୀ ୩୦ ତାରିଖରେ ମନ୍ଦିର ପରିସରରେ ଏକ ଟ୍ରଷ୍ଟ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ନିର୍ମଳ ଚନ୍ଦ୍ର ରାଉତରାୟଙ୍କୁ ଟ୍ରଷ୍ଟ ବୋର୍ଡର ପରିଚାଳନା ଟ୍ରଷ୍ଟି ଭାବରେ ନିର୍ବାଚିତ କରାଯାଇଛି। ଟ୍ରଷ୍ଟର ନାମ ଶ୍ରୀ ମା ତାରିଣୀ ଠାକୁରାଣୀ ଟ୍ରଷ୍ଟ ଭାବରେ ସ୍ଥିର କରାଯାଇଛି। ନୂତନ ଶ୍ରୀ ମା ତାରିଣୀ ଠାକୁରାଣୀ ଟ୍ରଷ୍ଟ ବୋର୍ଡର ଟ୍ରଷ୍ଟି ଭାବରେ ରାଉରକେଲା ତହସିଲଦାର ଉଦିତନଗର (ଟ୍ରଷ୍ଟି), ରଘୁନାଥପାଲ୍ଲୀ ଥାନାର ଇନ୍ସପେକ୍ଟର-ଇନ୍-ଚାର୍ଯ (ଟ୍ରଷ୍ଟି)ଙ୍କ ସମେତ ପରିଚାଳନା ଟ୍ରଷ୍ଟି ଭାବରେ ନିର୍ମଳ ଚନ୍ଦ୍ର ରାଉତରାୟ, ଟ୍ରଷ୍ଟି ଭାବରେ ଋଷିନାଥ ବିଶ୍ବାଳ, ଟ୍ରଷ୍ଟି ଦେବବ୍ରତ ବିହାରୀ, ଟ୍ରଷ୍ଟି ଦିବ୍ୟସିଂହ ସାମଲ, ଟ୍ରଷ୍ଟି ବିଜୟ ସାମଲ, ଟ୍ରଷ୍ଟି କାଶିନାଥ ସାହୁ, ଟ୍ରଷ୍ଟି ବୁଦ୍ଧରାମ ମହାନ୍ତି ଏବଂ ଟ୍ରଷ୍ଟି ଅଖିଳ ଦାଶ ପ୍ରମୁଖ ରହିଛନ୍ତି। ଶ୍ରୀ ମା ତାରିଣୀ ଠାକୁରାଣୀ ଟ୍ରଷ୍ଟର ପରିଚାଳନା ଟ୍ରଷ୍ଟି ନିର୍ମଳ ଚନ୍ଦ୍ର ରାଉତରାୟଙ୍କ ସମେତ ଟ୍ରଷ୍ଟ ବୋର୍ଡର ସଦସ୍ୟମାନେ ରାଜ୍ୟ ସରକାରଙ୍କ ପ୍ରତିନିଧି, ଆଇନ ବିଭାଗ, ଅତିରିକ୍ତ ସହାୟକ ଏଣ୍ଡାଓମେଣ୍ଟ କମିଶନର, ସମ୍ବଲପୁର ଏବଂ ମା ତାରିଣୀ ମନ୍ଦିରର କର୍ମଚାରୀ ଏବଂ ଭକ୍ତମାନଙ୍କୁ ଧନ୍ୟବାଦ ଦେବା ସହିତ ଟ୍ରଷ୍ଟ ବୋର୍ଡ ପକ୍ଷରୁ ରାଜ୍ୟ ସରକାରଙ୍କ ସମସ୍ତ ବିଭାଗୀୟ ଅଧିକାରୀ, ପ୍ରେସ୍ ଏବଂ ଗଣମାଧ୍ୟମକୁ ଏ ବିଷୟରେ ସୂଚନା ଦେଇଛନ୍ତି ।
About the Author
