ବର୍ଷା ଯୋଗୁଁ ରାଉରକେଲା ସହରର ସାଧାରଣ ଜୀବନଯାତ୍ରା ବାଧାପ୍ରାପ୍ତ

ରାଉରକେଲା ୫/୧୦,(ଉତ୍କଳ ସମାଚାର):ଲଘୁଚାପ ଜନିତ ଲଗାଣ ବର୍ଷା ଯୋଗୁଁ ସହରର ଗଳି ରାସ୍ତା ସମେତ ମୁଖ୍ୟ ରାସ୍ତାଗୁଡ଼ିକରେ ବର୍ଷା ପାଣି ଭର୍ତ୍ତି ହୋଇ ରହିଛି ଏବଂ ରାସ୍ତାରେ ଅଳିଆ ଗଦା ହୋଇ ରହିଛି। ସମଗ୍ର ସୁନ୍ଦରଗଡ଼ ଜିଲ୍ଲା ସମେତ ରାଉରକେଲା ଇସ୍ପାତ ସହରର ଲଘୁଚାପ ଯୋଗୁଁ ବର୍ଷା ଏବଂ ତୁହାକୁ ତୁହା ପବନ ଯୋଗୁଁ ଲୋକଙ୍କ ଜୀବନଯାତ୍ରା ବ୍ୟାହତ ହୋଇଛି। ବର୍ଷା ପୂର୍ବରୁ ଡ୍ରେନ୍ ସଠିକ୍ ଭାବରେ ସଫା ନ ହୋଇଥିବା ଯୋଗୁଁ ଡ୍ରେନର ମଇଳା ପାଣି ରାସ୍ତା ଉପରେ ପ୍ରବାହିତ ହେଉଛି। ଅନେକ ରାସ୍ତାରେ ଅଳିଆ ଗଦା ଦେଖିବାକୁ ମିଳିଛି, ଅଳିଆ ରାସ୍ତାରେ ପଡ଼ିଛି। ଶନିବାର ବିଳମ୍ବିତ ରାତିରୁ ବର୍ଷା ଏବଂ ଲଘୁଚାପ ଯୋଗୁଁ ପ୍ରବଳ ପବନ ସହରର ଅନେକ ସ୍ଥାନରେ ଜଳବନ୍ଦୀ ସୃଷ୍ଟି କରିଛି। ବର୍ଷା ରାଉରକେଲା ସହରର ଅନେକ ବସ୍ତି ଅଞ୍ଚଳରେ ବାସିନ୍ଦାଙ୍କ ପାଇଁ ଜୀବନକୁ କଷ୍ଟକର କରିଦେଇଛି। ବିଶେଷକରି ସ୍ମାର୍ଟ ସିଟିର ବାଲୁଘାଟ ବସ୍ତି, ଗାଢାଟୋଲା ବସ୍ତି, ମୋଚି ବସ୍ତି, ତରକେରା ବସ୍ତି, ବାଲୁଘାଟ ଉପର ବସ୍ତି ଏବଂ ସେକ୍ଟର-୧୬ ବସ୍ତିରେ ବର୍ଷା ପାଣି ରାସ୍ତା ଉପରେ ପାଣିର ସୁଅ ଚାଲିଛି। ରାଉରକେଲା ସହରର ମୁଖ୍ୟ ରାସ୍ତାରେ ଖାଲ ଖମାଲ ଯୋଗୁଁ ବର୍ଷା ପାଣି ଖାଲରେ ଭର୍ତ୍ତି ହୋଇଯାଇଛି। ପାୱାର ହାଉସ ଛକରୁ ମଧୁସୂଦନ ଛକ ଏବଂ ମହତାବ ରୋଡ ପର୍ଯ୍ୟନ୍ତ ରାସ୍ତାରେ ଥିବା ଖାଲ ଯୋଗୁଁ ରାସ୍ତାଗୁଡ଼ିକ ବର୍ଷା ପାଣିରେ ପରିପୂର୍ଣ୍ଣ ହୋଇଯାଇଛି। ଏହାଯୋଗୁଁ ଯେକୌଣସି ସମୟରେ ସଡ଼କ ଦୁର୍ଘଟଣା ଘଟିବାର ସମ୍ଭାବନା ରହିଛି । ରାଉରକେଲା ମହାନଗର ନିଗମର ବିଭାଗୀୟ ଅଧିକାରୀଙ୍କ ସମେତ ସ୍ମାର୍ଟ ସିଟିର ବିଭାଗୀୟ ଅଧିକାରୀ ଏବଂ କର୍ମଚାରୀମାନେ ଏଥିପ୍ରତି ବିଶେଷ ଧ୍ୟାନ ଦେବାକୁ ଲୋକମାନଙ୍କ ପକ୍ଷରୁ ଦାବି କରାଯାଇଛି। ଏଥିସହିତ ସଫେଇ କର୍ମଚାରୀମାନେ ସହରର ରାସ୍ତାରେ ଥିବା ଅଳିଆ ଗଦାକୁ ସଫା କରିବା ଉଚିତ, କାରଣ ବର୍ଷା ଯୋଗୁଁ ରୋଗ ବ୍ଯାପିବାର ଭୟ ରହିଛି। ବିଶେଷକରି ବର୍ଷା ଦିନରେ ମଇଳା ଯୋଗୁଁ ଅନେକ ପ୍ରକାରର ରୋଗ ହୋଇପାରେ, ସ୍ୱାସ୍ଥ୍ୟ ଅଧିକାରୀ ମଧ୍ୟ ଏଥିପ୍ରତି ବିଶେଷ ଧ୍ୟାନ ଦେବା ଉଚିତ। ସଫେଇ ଠିକାଦାର ଯୁଦ୍ଧକାଳୀନ ଭିତ୍ତିରେ ସହରର ମୁଖ୍ୟ ଡ୍ରେନକୁ ସଫା କରିବା ପାଇଁ ଦାବି ହେଉଛି।