ମାଓବାଦୀଙ୍କ ଉନ୍ମତ୍ତ କାଣ୍ଡ : ମୋବାଇଲ୍ ଟାୱାର ଉଡ଼ାଇବା ସହିତ ଧମକପୂର୍ଣ୍ଣ ପୋଷ୍ଟର

ରାଉରକେଲା ୧୪/୧୦,(ଉତ୍କଳ ସମାଚାର): ମାତ୍ର ଦୁଇ ଦିନ ପୂର୍ବରୁ ମାଓବାଦୀମାନେ ଜରେଇକେଲା ପୋଲିସ ସୀମା ଅନ୍ତର୍ଗତ କୋଲବଙ୍ଗାରେ ଏକ ମୋବାଇଲ୍ ଟାୱାର ଉଡ଼ାଇ ଦେଇଥିଲେ। ସେହି ଘଟଣାର ୪୮ ଘଣ୍ଟା ନପୁରୁଣୁ ଗତକାଲି ବିଳମ୍ବିତ ରାତିରେ, ମାଓବାଦୀମାନେ ପୁଣି ଆକ୍ରମଣ କରି ଏକ ମୋବାଇଲ ଟାଓ୍ବାର ଉଡାଇବା ସହିତ ଧମକପୂର୍ଣ୍ଣ ମାଓ ପୋଷ୍ଟର ଲଗାଇଛନ୍ତି। ଏଥର ଛୋଟନାଗାରା ପୋଲିସ ଥାନା ଅନ୍ତର୍ଗତ ବାହାଡା ଗାଁରେ ଥିବା ସେମାନେ ଏକ ଏୟାରଟେଲ୍ ମୋବାଇଲ୍ ଟାୱାର ଉଡ଼ାଇ ଦେଇଛନ୍ତି। ସ୍ଥାନୀୟ ଗ୍ରାମବାସୀଙ୍କ ସୂଚନା ଅନୁଯାୟୀ ପ୍ରାୟ ୧୨ରୁ ୧୫ ଜଣ ସଶସ୍ତ୍ର ମାଓବାଦୀ ରାତି ୧ଟା ବେଳେ ଗାଁରେ ପ୍ରବେଶ କରିଥିଲେ। ସେମାନେ ଗାଁର ଲୋକମାନଙ୍କୁ ଘରୁ ବାହାରକୁ ନ ବାହାରିବାକୁ ଚେତାବନୀ ଦେଇଥିଲେ। ତାପରେ ମାଓବାଦୀମାନେ ମୋବାଇଲ୍ ଟାୱାରରେ ପେଟ୍ରୋଲ ଢାଳି ନିଆଁ ଲଗାଇ ଦେବା ସହିତ ବିସ୍ଫୋରଣ ଘଟାଇଥିଲେ। ଯାହା ଫଳରେ ଏକ ଜୋରଦାର ବିସ୍ଫୋରଣ ହୋଇଥିଲା। ଆକ୍ରମଣ ପରେ, ମାଓବାଦୀମାନେ ସେହି ସ୍ଥାନରେ ପୋଷ୍ଟର ଲଗାଇ ନିକଟବର୍ତ୍ତୀ ଜଙ୍ଗଲରେ ଅଦୃଶ୍ୟ ହେବା ପୂର୍ବରୁ ସେମାନଙ୍କ ସାଥୀଙ୍କ ମୃତ୍ୟୁର ପ୍ରତିଶୋଧ ନେବାକୁ ଧମକ ଦେଇଥିଲେ। ଏହି ଘଟଣା ଗ୍ରାମବାସୀଙ୍କୁ ଭୟଭୀତ କରିଦେଇଛି। ଆଜି ସକାଳେ ସୁରକ୍ଷା ବାହିନୀ ଘଟଣାସ୍ଥଳରେ ପହଞ୍ଚି ଆଖପାଖ ଅଞ୍ଚଳରେ ତଲାସୀ ଅଭିଯାନ ଆରମ୍ଭ କରିଛନ୍ତି। ପୋଲିସ ପକ୍ଷରୁ ସବିଶେଷ ତଥ୍ୟ ପରେ ମିଳିପାରିବ ବୋଲି କୁହାଯାଇଛି।