ରାଉରକେଲା ୧୭/୮,(ଉତ୍କଳ ସମାଚାର) ଅଗଷ୍ଟ ୧୩ ଏବଂ ୧୬ ତାରିଖରେ ପ୍ରବଳ ବର୍ଷା ଯୋଗୁଁ ରାଉରକେଲାର ଅନେକ ଅଂଶ ଗୁରୁତର ଭାବରେ ଜଳବନ୍ଦୀ ହୋଇଥିଲା। ବର୍ଷା ପାଣି ଘର ଭିତରେ ପ୍ରବେଶ କରି ପ୍ରମୁଖ ରାସ୍ତାଗୁଡ଼ିକୁ ବୁଡ଼ାଇ ଦେଇଥିଲା। ରିଙ୍ଗ ରୋଡ୍ ଏବଂ ରାଉରକେଲା ମୁଖ୍ୟରାସ୍ତା ଉପରେ ପ୍ରବଳ ବର୍ଷା ପାଣି ପ୍ରବାହିତ ହେଉଥିବା ଦେଖାଯାଇଥିଲା। ଅପରପକ୍ଷରେ ଛେଣ୍ଡ ଏବଂ ବାସନ୍ତୀ କଲୋନୀର ଅନେକ ଅଞ୍ଚଳରେ ପ୍ରାୟ ୪ରୁ ୫ ଫୁଟ ଉଚ୍ଚତାର ଜଳବନ୍ଦୀ ଦେଖାଯାଇଥିଲା। କମ୍ ସମୟ ମଧ୍ୟରେ ପ୍ରବଳ ବର୍ଷା ଏବଂ ଡ୍ରେନେଜ୍ ଚ୍ୟାନେଲ ବନ୍ଦ ହୋଇଥିବାରୁ ଏହି ପରିସ୍ଥିତି ସୃଷ୍ଟି ହୋଇଥିବା କୁହାଯାଉଛି। ସ୍ଥାନୀୟ ବାସିନ୍ଦା ଏବଂ ରାଉରକେଲା ମ୍ୟୁନିସିପାଲ୍ କର୍ପୋରେସନ୍ (ଆରଏମସି) ସମସ୍ୟାର ସମାଧାନ ପାଇଁ ପଦକ୍ଷେପ ନେଉଥିବା ବେଳେ, ଆଜି ରେଳ ବିଭାଗ ପକ୍ଷରୁ ଉଚ୍ଚ କର୍ତ୍ତୃପକ୍ଷ ମଧ୍ୟ ପରିସ୍ଥିତିର ସମୀକ୍ଷା କରିଥିଲେ। ଆଜି ସକାଳେ, ରାଉରକେଲା ବିଧାୟକ ସାରଦା ପ୍ରସାଦ ନାୟକ, ରାଉରକେଲା ଅତିରିକ୍ତ ଜିଲ୍ଲାପାଳ ତଥା ମହାନଗର ନିଗମ ଆୟୁକ୍ତ ଦିନାଃ ଦସ୍ତଗୀରଙ୍କ ସମେତ ଦକ୍ଷିଣପୂର୍ବ ରେଳବାଇର ଚକ୍ରଧରପୁର ଡିଭିଜନର ଡିଆରଏମ୍ ତରୁଣ କୁମାର ଏବଂ ଅନ୍ୟାନ୍ୟ ଅଧିକାରୀ ମାଲଗୋଦାମ ଅଞ୍ଚଳ ଏବଂ ରାଉରକେଲା ରେଳ ଷ୍ଟେସନର ଦ୍ୱିତୀୟ ପ୍ରବେଶ ପଥ ପରିଦର୍ଶନ କରିଥିଲେ। ଡିଆରଏମ୍ ତାଙ୍କ ପ୍ରତିକ୍ରିୟାରେ କହିଛନ୍ତି ଯେ ରେଳବାଇ ଦ୍ୱାରା ନିର୍ମିତ ଡ୍ରେନେଜ୍ ସିଷ୍ଟମ୍ ସଠିକ୍ ଭାବରେ କାର୍ଯ୍ୟ କରୁଛି ଏବଂ ଡ୍ରେନ୍ ବନ୍ଦ ହେବା ଦ୍ୱାରା ମୁଖ୍ୟ ସମସ୍ୟା ସୃଷ୍ଟି ହୋଇଛି। ସେ ଗୁରୁତ୍ୱାରୋପ କରିଥିଲେ ଯେ ସମସ୍ତଙ୍କ ସମନ୍ୱିତ ପ୍ରୟାସ ଦ୍ୱାରା ବାରମ୍ବାର ଜଳବନ୍ଦୀ ହେଉଥିବା ସମସ୍ୟାର ସମାଧାନ ସହଜ ହୋଇପାରିବ। ବିଧାୟକ ସାରଦା ପ୍ରସାଦ ନାୟକ କହିଥିଲେ ଯେ, ରାଉରକେଲା ଇସ୍ପାତ କାରଖାନା, ରେଳବାଇ ଏବଂ ରାଉରକେଲା ମ୍ୟୁନିସିପାଲ କର୍ପୋରେସନ ମଧ୍ୟରେ ଉପଯୁକ୍ତ ସମନ୍ୱୟର ଅଭାବ ଜଳବନ୍ଦୀ ସମସ୍ୟାକୁ ଆହୁରି ବୃଦ୍ଧି କରୁଛି। ରାଉରକେଲା ଅତିରିକ୍ତ ଜିଲ୍ଲାପାଳ ତଥା ମହାନଗର ନିଗମ ଆୟୁକ୍ତ ସୁଶ୍ରୀ ଦୀନାଃ ଦସ୍ତଗୀର୍, ଚକ୍ରଧରପୁର ଡିଆରଏମ୍ ତରୁଣ କୁମାର ଏବଂ ରାଉରକେଲା ବିଧାୟକ ସାରଦା ପ୍ରସାଦ ନାୟକ ଆସ୍ବସ୍ତି ପ୍ରକାଶକରି କହିଛନ୍ତି ଯେ, ଭବିଷ୍ୟତରେ ପ୍ରବଳ ବର୍ଷା ସମୟରେ ସହରରେ ଏପରି ଗୁରୁତର ଜଳବନ୍ଦୀ ସମସ୍ୟା ସୃଷ୍ଟି ନହେବା ପାଇଁ ପ୍ରୟାସ କରାଯାଉଛି।
About the Author
