ରାଉରକେଲା ୯/୧୨,(ଉତ୍କଳ ସମାଚାର) ଛେଣ୍ଡ ସ୍ଥିତ ବିଜୁ ପଟ୍ଟନାୟକ ବୈଷୟିକ ବିଶ୍ୱବିଦ୍ୟାଳୟରେ ୩୬ ଘଣ୍ଟିଆ ସ୍ମାର୍ଟ ଇଣ୍ଡିଆ ହାକାଥନ୍-୨୦୨୫ର ଗ୍ରାଣ୍ଡ ଫାଇନାଲ ଉଦ୍ଘାଟିତ ହୋଇଯାଇଛି । ଭାରତର ୧୦ଟି ରାଜ୍ୟ – ଯଥା ମହାରାଷ୍ଟ୍ର, ତାମିଲନାଡୁ, କର୍ଣ୍ଣାଟକ, ଉତ୍ତର ପ୍ରଦେଶ, ଛତିଶଗଡ଼, ପଶ୍ଚିମବଙ୍ଗ, ହରିୟାଣା, ଝାଡ଼ଖଣ୍ଡ, ତେଲେଙ୍ଗାନା ଏବଂ ପଞ୍ଜାବରୁ ଅନ୍ତିମ ପର୍ଯ୍ୟାୟରେ ପହଞ୍ଚିଥିବା ୧୫୦ରୁ ଅଧିକ ଛାତ୍ରଛାତ୍ରୀ ଏବଂ ସେମାନଙ୍କର ପରାମର୍ଶଦାତାଙ୍କୁ ନେଇ ଗଠିତ ୨୫ଟି ଦଳ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିଛନ୍ତି। ଏହି ଦଳଗୁଡ଼ିକ କୃଷି ଓ କୃଷକ କଲ୍ୟାଣ ମନ୍ତ୍ରଣାଳୟ ଏବଂ ଶିକ୍ଷା ମନ୍ତ୍ରଣାଳୟ ଦ୍ୱାରା ଚିହ୍ନଟ କରାଯାଇଥିବା ପାଞ୍ଚଟି ବାସ୍ତବ-ବିଶ୍ୱ ସମସ୍ୟାର ସମାଧାନ ବିକାଶ ଉପରେ କାର୍ଯ୍ୟ କରିବେ। ଏହି ସମସ୍ୟା ଭିତରେ ଡିଜିଟାଲ୍ ଶାସନ, ଶିକ୍ଷା, କୃଷି ଏବଂ ସାଇବର ସୁରକ୍ଷା ଭଳି ଗୁରୁତ୍ୱପୂର୍ଣ୍ଣ କ୍ଷେତ୍ର ଅନ୍ତର୍ଭୁକ୍ତ।କାର୍ଯ୍ୟକ୍ରମର ଆନୁଷ୍ଠାନିକ ଉଦ୍ଘାଟନ ୨୦୨୫ ଡିସେମ୍ବର ୮ ତାରିଖ ସକାଳ ୮ଟାରେ ବିଶ୍ୱବିଦ୍ୟାଳୟ ପାଠାଗାର ଭବନରେ ଅନୁଷ୍ଠିତ ହୋଇଥିଲା। କାର୍ଯ୍ୟକ୍ରମରେ ସମ୍ମାନିତ ଅତିଥିମାନଙ୍କ ମଧ୍ୟରେ ମୁଖ୍ୟ ଅତିଥି ଭାବେ ରଘୁନାଥପାଲ୍ଲୀ ବିଧାୟକ ଦୁର୍ଗା ଚରଣ ତନ୍ତୀ, ସମ୍ମାନିତ ଅତିଥି ଭାବରେ ଭାରତ ସରକାରଙ୍କ ଶିକ୍ଷା ମନ୍ତ୍ରାଳୟର ଇନୋଭେସନ୍ ସେଲ୍ ନିର୍ଦ୍ଦେଶକ ଯୋଗେଶ ଡି. ବ୍ରହ୍ମାକର, ସୁନ୍ଦରଗଡ ଜିଲ୍ଲାପାଳ ଡକ୍ଟର ଶୁଭଙ୍କର ମହାପାତ୍ର, ବିପିୟୁଟିର କୁଳପତି ପ୍ରଫେସର ଅମୀୟ କୁମାର ରଥ ଏବଂ ବିପିୟୁଟିର କୁଳସଚିବ ଶ୍ରୀମତୀ ନିଶି ପୁନମ୍ ମିଞ୍ଜ୍ ପ୍ରମୁଖ ଯୋଗ ଦେଇଥିଲେ। ସେମାନେ ଅଂଶଗ୍ରହଣକାରୀ ଛାତ୍ରଛାତ୍ରୀମାନଙ୍କୁ ପରିବର୍ତ୍ତନର ସୂତ୍ରଧର ଭାବେ ପ୍ରଯୁକ୍ତିବିଦ୍ୟାକୁ ବ୍ୟବହାର କରିବାକୁ ସାମୂହିକ ଭାବରେ ଉତ୍ସାହିତ କରିଥିଲେ। ଏହି କାର୍ଯ୍ୟକ୍ରମରେ ଉପସ୍ଥିତ ବିପିୟୁଟିର କୁଳପତି ପ୍ରଫେସର ରଥ ଅଂଶଗ୍ରହଣକାରୀ ଏବଂ ମୂଲ୍ୟାଙ୍କନକାରୀ ସଦସ୍ୟମାନଙ୍କୁ ସ୍ୱାଗତ କରି ନବସୃଜନ ଏବଂ ଉଦ୍ୟୋଗକୁ ପ୍ରୋତ୍ସାହିତ କରିବା ପାଇଁ ବିଶ୍ୱବିଦ୍ୟାଳୟର ପ୍ରତିବଦ୍ଧତା ଉପରେ ଆଲୋକପାତ କରିଥିଲେ। ଶ୍ରୀ ବ୍ରହ୍ମାକର ସ୍ମାର୍ଟ ଇଣ୍ଡିଆ ହାକାଥନ୍ ଭଳି ମେଗା-ଇଭେଣ୍ଟ ମାଧ୍ୟମରେ ନବସୃଜନ ଏବଂ ପ୍ରଯୁକ୍ତିବିଦ୍ୟାକୁ ପ୍ରୋତ୍ସାହିତ କରିବା ଉପରେ ଭାରତ ସରକାରଙ୍କ ଧ୍ୟାନ ଉପରେ ଗୁରୁତ୍ୱାରୋପ କରି ଏହି କାର୍ଯ୍ୟକ୍ରମ ବିଶ୍ୱର ସର୍ବବୃହତ ନବସୃଜନ ପ୍ଲାଟଫର୍ମରେ ପରିଣତ ହୋଇଛି ବୋଲି ପ୍ରକାଶ କରିଥିଲେ। ଡକ୍ଟର ମହାପାତ୍ର ଛାତ୍ରଛାତ୍ରୀମାନଙ୍କୁ ସୃଜନଶୀଳ ଭାବରେ ଚିନ୍ତା କରିବାକୁ ଏବଂ ସାମାଜିକ ଚ୍ୟାଲେଞ୍ଜର ସମାଧାନ ବିକଶିତ କରିବାକୁ ଉତ୍ସାହିତ କରିଥିଲେ। ମୁଖ୍ୟ ଅତିଥି ରଘୁନାଥପାଲି ବିଧାୟକ ଦୁର୍ଗାଚରଣ ତନ୍ତୀ ସମସ୍ତ ଅଂଶଗ୍ରହଣକାରୀଙ୍କୁ ରାଉରକେଲାକୁ ସ୍ୱାଗତ ଜଣାଇବା ସହିତ କାର୍ଯ୍ୟକ୍ରମ ପାଇଁ ସେମାନଙ୍କୁ ଶୁଭକାମନା ଜଣାଇଥିଲେ। କୁଳସଚିବ ଶ୍ରୀମତୀ ମିଞ୍ଜ ଧନ୍ୟବାଦ ପ୍ରସ୍ତାବ ଆଗତ କରି ଅତିଥି, ଅଂଶଗ୍ରହଣକାରୀ ଏବଂ ଆୟୋଜକଙ୍କ ପ୍ରତି କୃତଜ୍ଞତା ପ୍ରକାଶ କରିଥିଲେ। ସ୍ଥାନୀୟ ଉଦ୍ଘାଟନ ପରେ ଏହି କାର୍ଯ୍ୟକ୍ରମର ଏକ କେନ୍ଦ୍ରୀୟ ବିଦ୍ୟାଳୟରେ ସକାଳ ୯ଟାରେ ଅଭାଷୀ ମାଧ୍ୟମରେ କରାଯାଇଥିଲା। ଏଥିରେ ବିପିୟୁଟି ସମେତ ଯାହା ସାରା ଭାରତର ସମସ୍ତ ୬୦ଟି ନୋଡାଲ୍ କେନ୍ଦ୍ର ସହିତ ସଂଯୋଗ କରିଥିଲା। କେନ୍ଦ୍ରୀୟ ସମାରୋହରେ ଏଆଇସିଟିଇର ଅଧ୍ୟକ୍ଷ ପ୍ରଫେସର ଟି. ଜି. ସୀତାରାମ ଏବଂ ଉପାଧ୍ୟକ୍ଷ ଡକ୍ଟର ଅଭୟ ଜେରେ ସମେତ ଶିକ୍ଷା ମନ୍ତ୍ରଣାଳୟ, ଏଆଇସିଟିଇ ଏବଂ ଶିଳ୍ପ ଅଂଶୀଦାରଙ୍କ ସମେତ ଅନ୍ୟ ମାନ୍ୟଗଣ୍ୟ ବ୍ୟକ୍ତିମାନେ ଉପସ୍ଥିତ ଥିଲେ। ଭାରତ ସରକାରଙ୍କ ଶିକ୍ଷା ମନ୍ତ୍ରଣାଳୟଙ୍କ ଇନୋଭେସନ୍ ସେଲ୍ ଏବଂ ଅଖିଳ ଭାରତୀୟ ବୈଷୟିକ ଶିକ୍ଷା ପରିଷଦ, ନୂଆଦିଲ୍ଲୀଙ୍କ ଅଧୀନରେ ଆରମ୍ଭ ହୋଇଥିବା ସ୍ମାର୍ଟ ଇଣ୍ଡିଆ ହାକାଥନ ବିଶ୍ୱର ସର୍ବବୃହତ ମୁକ୍ତ ନବସୃଜନ ପ୍ଲାଟଫର୍ମ ମଧ୍ୟରୁ ଅନ୍ୟତମ, ଯାହା ଭାରତର ଯୁବପିଢ଼ିଙ୍କୁ ସେମାନଙ୍କର ସୃଜନଶୀଳତା ଏବଂ ସମସ୍ୟା ସମାଧାନ ଦକ୍ଷତା ପ୍ରଦର୍ଶନ କରିବାକୁ ସଶକ୍ତ କରେ। ଚଳିତ ବର୍ଷ, ସ୍ମାର୍ଟ ଇଣ୍ଡିଆ ହାକାଥନ୍ ପାଇଁ କଲେଜ ଏବଂ ପ୍ରତିଷ୍ଠାନ ସ୍ତର ପ୍ରତିଯୋଗିତାରେ ସାରା ଭାରତରୁ ୮ ଲକ୍ଷରୁ ଅଧିକ ଅଂଶଗ୍ରହଣକାରୀଙ୍କୁ ନେଇ ୬୮ ହଜାରରୁ ଅଧିକ ଦଳ ଅଂଶଗ୍ରହଣ କରିଥିଲେ । ଏଥିମଧ୍ୟରୁ କେବଳ ୧,୩୬୦ ଶ୍ରେଷ୍ଠ ପ୍ରଦର୍ଶନକାରୀ ଦଳ ଗ୍ରାଣ୍ଡ ଫାଇନାଲ ପାଇଁ ସଂକ୍ଷିପ୍ତ ତାଲିକାଭୁକ୍ତ ହୋଇଛନ୍ତି। ଏହି ସଂକ୍ଷିପ୍ତ ତାଲିକାଭୁକ୍ତ ଛାତ୍ରଛାତ୍ରୀମାନେ ପରାମର୍ଶଦାତା ଏବଂ ମୂଲ୍ୟାଙ୍କନକାରୀଙ୍କ ମାର୍ଗଦର୍ଶନରେ ଚିନ୍ତାଧାରା, ଡିଜାଇନ୍ ଏବଂ ଅଭିନବ ପ୍ରୋଟୋଟାଇପ୍ ବିକାଶ ପାଇଁ ୩୬ ଘଣ୍ଟା ନିରନ୍ତର କାର୍ଯ୍ୟ କରିବେ।ଛାତ୍ରମାନଙ୍କ ମଧ୍ୟରେ ନବସୃଜନ ଏବଂ ଉଦ୍ୟୋଗୀ ଦକ୍ଷତାକୁ ପ୍ରୋତ୍ସାହିତ କରିବା ପାଇଁ ଲକ୍ଷ୍ୟ ରଖାଯାଇଥିବା ଏହି ହାକାଥନ୍, ଶିକ୍ଷା, ନବସୃଜନ ଏବଂ ଗବେଷଣାରେ ଉତ୍କର୍ଷତାର କେନ୍ଦ୍ର ଭାବରେ ଉଭା ହେବା ପାଇଁ ବିପିୟୁଟିର ଦୃଷ୍ଟିକୋଣ ସହିତ ସମନ୍ୱିତ। ବିପିୟୁଟିର ସମଗ୍ର ଅଧ୍ୟାପକ, ନିର୍ଦ୍ଦେଶକ, ଅଧିକାରୀ ଏବଂ କର୍ମଚାରୀଙ୍କ ଅବିଶ୍ରାନ୍ତ ପ୍ରୟାସଦ୍ୱାରା ଏହି କାର୍ଯ୍ୟକ୍ରମ ସଫଳତାର ସହ ସମ୍ଭବ ହୋଇପାରିଛି ।
About the Author
