ରାଉରକେଲା ୨୫/୧୨,(ଉତ୍କଳ ସମାଚାର)ମୋଟର ଯାନ ପାଇଁ ପ୍ରଦୂଷଣ ନିୟନ୍ତ୍ରଣ (PUC) ପ୍ରମାଣପତ୍ର ପାଇବାରେ ସାଧାରଣ ଜନତା ସମ୍ମୁଖୀନ ହେଉଥିବା ଅସୁବିଧାକୁ ଦୃଷ୍ଟିରେ ରଖି, “ବୈଧ ପ୍ରଦୂଷଣ ପ୍ରମାଣପତ୍ର ବିନା ଇନ୍ଧନ ନାହିଁ” ନିଷ୍ପତ୍ତିର କାର୍ଯ୍ୟକାରୀତାକୁ ସ୍ଥଗିତ ରଖାଯାଇଛି। ପୂର୍ବରୁ ଏହି ନିର୍ଦ୍ଦେଶ ଜାନୁଆରୀ ୧ ତାରିଖରୁ କାର୍ଯ୍ୟକାରୀ ହେବାକୁ ପରିବହନ ଆୟୁକ୍ତଙ୍କ ମାଧ୍ୟମରେ ସୂଚନା ଦିଆଯାଇଥିଲା। ଗାଡି ମାଲିକଙ୍କ ଚାହିଦା ଏବଂ ଅସୁବିଧାକୁ ଦୃଷ୍ଟିରେ ରଖି ବାଣିଜ୍ୟ ଓ ପରିବହନ ମନ୍ତ୍ରୀ ବିଭୂତି ଭୂଷଣ ଜେନାଙ୍କ ନିର୍ଦ୍ଦେଶ କ୍ରମେ ଏହାକୁ ଫେବୃଆରୀ ୧ ତାରିଖକୁ ବୃଦ୍ଧି କରାଯାଇଛି। ଏହି ବର୍ଦ୍ଧିତ ଅବଧି ମଧ୍ୟରେ, ପରିବହନ ବହନ ବିଭାଗ ମୋଟର ଯାନ ଆଇନ ଅନୁଯାୟୀ ବାଧ୍ୟତାମୂଳକ ଭାବରେ ବୈଧ ପ୍ରଦୂଷଣ ପ୍ରମାଣପତ୍ର ନଥିବା ଯାନ ମାଲିକମାନଙ୍କୁ ସେମାନଙ୍କର ଯାନ ପରୀକ୍ଷା କରାଇବା ଓ ଆବଶ୍ୟକୀୟ ପ୍ରମାଣପତ୍ର ପାଇବା ପାଇଁ ଅନୁରୋଧ କରାଯାଇଛି। ଏହି ସମୟ ବୃଦ୍ଧି ଗାଡି ମାଲିକଙ୍କୁ ସୁଗମ ଏବଂ ଦ୍ୱନ୍ଦ୍ୱ ପ୍ରକ୍ରିୟା ସମାପ୍ତ କରିବାରେ ସାହାଯ୍ୟ କରିବ ବୋଲି ଆଶା କରାଯାଉଛି। ଏହା ମଧ୍ୟ ସ୍ପଷ୍ଟ କରାଯାଇଛି ଯେ ଫେବୃଆରୀ ୧ ତାରିଖ ପୂର୍ବରୁ ପ୍ରଦୂଷଣ ପ୍ରମାଣପତ୍ର ବିନା କୌଣସି ପେଟ୍ରୋଲ ପମ୍ପରେ ଯାନକୁ ଇନ୍ଧନ ଦେବାକୁ ମନା କରାଯିବ ନାହିଁ। ଏହି ସମୟ ମଧ୍ୟରେ, ରାଜ୍ୟ ପରିବହନ ବିଭାଗ ପ୍ରଦୂଷଣ ପ୍ରମାଣପତ୍ରର ଗୁରୁତ୍ୱ ଏବଂ ଆବଶ୍ୟକତା ବିଷୟରେ ଯାନବାହନ ମାଲିକମାନଙ୍କୁ ସଚେତନ କରିବା ପାଇଁ ବ୍ୟାପକ ସଚେତନତା କାର୍ଯ୍ୟକ୍ରମ ହାତକୁ ନେବାକୁ ନିଷ୍ପତ୍ତି ନେଇଛି। ଉଲ୍ଲେଖଯୋଗ୍ୟ ଯେ, ରାଜ୍ୟ ପରିବହନ ବିଭାଗ ଦ୍ୱାରା ଜାରି କରାଯାଇଥିବା ପୂର୍ବ ନିର୍ଦ୍ଦେଶକୁ ସଂଶୋଧନ କରିବା ଏବଂ ପାଳନ ପାଇଁ ଅଧିକ ସମୟ ଦେବା ପାଇଁ ବିଭିନ୍ନ ସ୍ତରରେ ଦାବି ଉଠିଥିଲା। ରାଉରକେଲାରେ ମଧ୍ୟ ସମାନ ଚିନ୍ତା ପ୍ରକାଶ ପାଇଥିଲା, ଯାହା ଫଳରେ ବୃହତର ଜନସ୍ୱାର୍ଥ ଦୃଷ୍ଟିରୁ କର୍ତ୍ତୃପକ୍ଷ ଏହି ସମୟ ବୃଦ୍ଧି କରିବାକୁ ବାଧ୍ୟ ହୋଇଥିଲେ। ଏଠାରେ ସରକାର ଓ ବିଭାଗଙ୍କ ଉଦାସୀନତା ଯୋଗୁଁ ପ୍ରଦ୍ଯୁଷଣ ସମସ୍ଯା ଦିନକୁ ଦିନ ବଢି ଚାଲିଛି। ଦିଲ୍ଲୀରେ ଅତ୍ଯଧିକ ଶିଳ୍ପାନ୍ବୟନ ସମେତ ଗାଡିରୁ ବାହାରୁଥିବା ଧୂଆଁ ତତସହିତ ନଡା (ପରେଲି) ପୋଡଯିବା ଯୋଗୁଁ ପ୍ରଦ୍ଯୁଷଣ ସମସ୍ଯା ନିୟନ୍ତ୍ରଣ ବାହାରକୁ ଚାଲିଯାଉଛି। କିନ୍ତୁ ଓଡ଼ିଶା ଏକ କୃଷିପ୍ରଧାନ ରାଜ୍ୟ, ଏଠାରେ ଧାନ ଫସଲର ନଡା ପୋଡାଯାଏ ନାହିଁ। ଏଥିସହିତ ସମଗ୍ର ଓଡିଶା ପ୍ରଦ୍ଯୁଷିତ ନୁହେଁ। ଭୁବନେଶ୍ବର, କଟକ, ରାଉରକେଲା ଓ ଅନ୍ୟାନ୍ୟ କେତେକ ସହରକୁ ଛାଡିଦେଲେ ବାକି ଅଞ୍ଚଳରେ ପ୍ରଦ୍ଯୁଷଣ ସମସ୍ଯା ଦେଖିବାକୁ ମିଳେନାହିଁ। ଓଡିଶାର ପ୍ରଦ୍ଯୁଷଣ ନିୟନ୍ତ୍ରଣ ବୋର୍ଡ ଦୋଷମୁକ୍ତ ନୁହେଁ। ଓଡିଶାର ଶିଳ୍ପଗୁଡିକ ସହରାଞ୍ଚଳରେ ରହିଛି। ରାଉରକେଲା ଇସ୍ପାତ କାରଖାନାରୁ ବାହାରୁଥିବା କଳା ଧୂଆଁ ଏବଂ କାରଖାନା ପରିସର ମଧ୍ୟରେ ଚାଲୁଥିବା ବହୁ ପୁରୁଣା ଗାଡିରୁ ବାହାରୁଥିବା ଧୂଆଁ ସହରକୁ ପ୍ରଦ୍ଯୁଷିତ କରୁଛି କି ନାହିଁ ଏହାର ସଠିକ ଉତ୍ତର ରାଜ୍ୟ ଆଞ୍ଚଳିକ ପ୍ରଦୂଷଣ ନିୟନ୍ତ୍ରଣ ବୋର୍ଡ ନିକଟରେ ନାହିଁ। ସ୍ପଞ୍ଜ ଆଇରନ୍ କାରଖାନାଗୁଡିକରେ ଇଏସପି ନଥାଇ ଚାଲୁଛି କାରଖାନା ! ରାଉରକେଲାରେ ଥିବା ରାଜ୍ୟ ଆଞ୍ଚଳିକ ପ୍ରଦ୍ଯୁଷଣ ନିୟନ୍ତ୍ରଣ ବୋର୍ଡ ନିଜର ବଦନାମ ପାଇଁ ଠିକ୍ ଭାବରେ କାର୍ଯ୍ୟ କରୁନଥିବା ଅଭିଯୋଗ ଉଠୁଛି। ଏହି ସମସ୍ତ କାରଖାନା ପ୍ରଦ୍ଯୁଷଣ ମୁକ୍ତ ନୁହେଁ ବୋଲି ସରକାର ଓ ବିଭାଗ ସ୍ପଷ୍ଟ କରିବା ଆବଶ୍ୟକ। ପରିବହନ ବିଭାଗ ଏ ସମସ୍ତ ସମସ୍ୟାକୁ ନେଇ ଗରୀବ ଜନସାଧାରଣଙ୍କ କୋପଦୃଷ୍ଟିରେ ନଆସୁ ବୋଲି ବୁଦ୍ଧିଜୀବି ମହଲରେ ପ୍ରଶ୍ନ ଉଠିଛି।
About the Author
