ରାଉରକେଲା ୨୫/୧୨,(ଉତ୍କଳ ସମାଚାର) ବିଜୁ ପଟ୍ଟନାୟକ ବୈଷୟିକ ବିଶ୍ୱବିଦ୍ୟାଳୟ ପକ୍ଷରୁ ୨୦୨୫ ଡିସେମ୍ବର ୨୪ ଦିନ ଏହାର ପ୍ରମୁଖ ବିପିୟୁଟି ପ୍ରକଳ୍ପ ପ୍ରଦର୍ଶନୀ ୨୦୨୫ର (ତୃତୀୟ ସଂସ୍କରଣ) ସଫଳତାର ସହ ଆୟୋଜିତ ହୋଇଯାଇଛି। ଚଳିତ ବର୍ଷର ପ୍ରଦର୍ଶନୀର ବିଷୟବସ୍ତୁ ଥିଲା ବିକଶିତ ଭାରତ ପାଇଁ ସ୍ଥାୟୀ ବିକାଶ ଲକ୍ଷ୍ୟରେ ବୁଦ୍ଧିମାନ ସମାଧାନ। ଓଡ଼ିଶାର ୩୧ଟି ସଂଲଗ୍ନ ଏବଂ ଅନୁବନ୍ଧିତ ମହାବିଦ୍ୟାଳୟର ୩୦୦ରୁ ଅଧିକ ଛାତ୍ରଛାତ୍ରୀ ମୋଟ ୧୩୨ଟି ଅଭିନବ ପ୍ରକଳ୍ପ ପ୍ରଦର୍ଶିତ କରିଥିଲେ। ଏହି ପ୍ରଦର୍ଶନୀ ଭୁବନେଶ୍ୱରର ଗଙ୍ଗପଦା ସ୍ଥିତ ସହଭାଗୀ ଗୀତମ ଏବଂ ଗାନ୍ଧୀ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି ଆଣ୍ଡ ମ୍ୟାନେଜମେଣ୍ଟ ସହଯୋଗରେ ଅନୁଷ୍ଠିତ ହୋଇଥିଲା। ଏହି ପ୍ରଦର୍ଶନୀରେ ପରିବେଶ ଏବଂ ସ୍ଥାୟୀ ବିକାଶ ଉପରେ ବିଶେଷ ଗୁରୁତ୍ୱ ସହିତ କୃତ୍ରିମ ବୁଦ୍ଧିମତା, ଇଣ୍ଟରନେଟ୍ ଅଫ୍ ଥିଙ୍ଗସ୍, ରୋବୋଟିକ୍ସ, ସାଇବର ସିକ୍ୟୁରିଟି ଏବଂ ମେକାନିକାଲ୍, ଇଲେକ୍ଟ୍ରିକାଲ୍ ଓ ସିଭିଲ୍ ଇଞ୍ଜିନିୟରିଂ ଭଳି ବିଭିନ୍ନ ଆଧୁନିକ ତଥା ସାମାଜିକ ପ୍ରାସଙ୍ଗିକ ଇତ୍ୟାଦିକୁ ନେଇ ପ୍ରକଳ୍ପ ଗୁଡ଼ିକ ଉପସ୍ଥାପିତ ହୋଇଥିଲା।ର୍ଯ୍ୟକ୍ରମର ଆନୁଷ୍ଠାନିକ ଉଦଘାଟନ ଭୁବନେଶ୍ୱର ଗୀତମର ଓମ୍ ବାଲାଜୀ ଅଡିଟୋରିୟମରେ ଅନୁଷ୍ଠିତ ହୋଇଥିଲା। ଏହି ଉତ୍ସବର ମୁଖ୍ୟ ଅତିଥି ଭାବେ ଓୟୁଟିଆରର କୁଳପତି ପ୍ରଫେସର ବିଭୂତି ଭୂଷଣ ବିଶ୍ୱାଳ, ମୁଖ୍ୟ ପୃଷ୍ଠପୋଷକ ଭାବେ ବିପିୟୁଟିର କୁଳପତି ପ୍ରଫେସର ଅମିୟ କୁମାର ରଥ, ସମ୍ମାନିତ ଅତିଥି ଭାବେ କଗ୍ନିଜାଣ୍ଟ ଟେକ୍ନୋଲୋଜି ସଲ୍ୟୁସନର ଉପ-ସଭାପତି ସତୀଶ କୁମାର ପ୍ରଧାନ, ଓକେସିଏଲର ପରିଚାଳନା ନିର୍ଦ୍ଦେଶକ ଡକ୍ଟର ମନୋରଞ୍ଜନ ପୁଥାଳ ଏବଂ ଗୀତମର ଅଧ୍ୟକ୍ଷ ଡକ୍ଟର ଅଜୟ କୁମାର ପ୍ରଧାନ ଯୋଗ ଦେଇଥିଲେ। ମୁଖ୍ୟ ଅତିଥି ପ୍ରଫେସର ବିଶ୍ୱାଳ ତାଙ୍କ ଅଭିଭାଷଣରେ କହିଥିଲେ ଯେ, ଆଜିର ଦ୍ରୁତ ପରିବର୍ତ୍ତନଶୀଳ ଦୁନିଆରେ ଛାତ୍ରଛାତ୍ରୀମାନେ କେବଳ ବୈଷୟିକ ଜ୍ଞାନ ନୁହେଁ, ବରଂ ନୈତିକ ଉଦ୍ଭାବନ, ଗଠନମୂଳକ ଚିନ୍ତାଧାରା ଏବଂ ପ୍ରଭାବଶାଳୀ ସହଯୋଗ କରିବାର କ୍ଷମତା ରଖିବା ଉଚିତ। କୁଳପତି ପ୍ରଫେସର ରଥ ବୃତ୍ତିଗତ ଦକ୍ଷତା, ନୈତିକ ମୂଲ୍ୟବୋଧ, ନେତୃତ୍ୱ ଏବଂ ସାମାଜିକ ଦାୟିତ୍ୱବୋଧ ଉପରେ ଗୁରୁତ୍ୱାରୋପ କରିବା ସହ ଏଥିପାଇଁ ବିଶ୍ୱବିଦ୍ୟାଳୟ ପକ୍ଷରୁ ନିଆଯାଉଥିବା ପଦକ୍ଷେପ ବିଷୟରେ ଆଲୋକପାତ କରିଥିଲେ। ସମ୍ମାନିତ ଅତିଥି ସତୀଶ କୁମାର ପ୍ରଧାନ। ସେ ସ୍ୱାସ୍ଥ୍ୟସେବା, ଅର୍ଥନୀତି, ଉତ୍ପାଦନ ଏବଂ ଶିକ୍ଷା କ୍ଷେତ୍ରରେ କୃତ୍ରିମ ବୁଦ୍ଧିମତାର ପରିବର୍ତ୍ତନଶୀଳ ଭୂମିକା ବିଷୟରେ ଆଲୋଚନା କରିଥିଲେ। ଡକ୍ଟର ପୁଥାଳ ଆଶା ପ୍ରକଟ କରିଥିଲେ ଯେ ପ୍ରଦର୍ଶନୀରେ ପ୍ରଦର୍ଶିତ ନୂତନ ଚିନ୍ତାଧାରା ସମାଜ ପାଇଁ ଲାଭଦାୟକ ଉତ୍ପାଦରେ ପରିଣତ ହେବ। ପ୍ରଫେସର ଅଜୟ କୁମାର ପ୍ରଧାନ ଛାତ୍ରଛାତ୍ରୀଙ୍କ ମଧ୍ୟରେ ଉଦ୍ଭାବନ, ସୃଜନଶୀଳତା ଏବଂ ଅଭିଜ୍ଞତାଭିତ୍ତିକ ଶିକ୍ଷାକୁ ପ୍ରୋତ୍ସାହିତ କରିବାରେ ଏହି ପ୍ରଦର୍ଶନୀର ଭୂମିକା ଉପରେ ଗୁରୁତ୍ୱାରୋପ କରିଥିଲେ। କାର୍ଯ୍ୟକ୍ରମଟି ସଂଯୋଜକ ଡକ୍ଟର ପ୍ରକାଶ କୁମାର ପଣ୍ଡାଙ୍କ ସ୍ୱାଗତ ଭାଷଣରୁ ଆରମ୍ଭ ହୋଇ ବିପିୟୁଟିର ଉପ-କୁଳସଚିବ ଡକ୍ଟର ଶୁଭେନ୍ଦୁ କୁମାର ରଥଙ୍କ ଧନ୍ୟବାଦ ଅର୍ପଣ ସହ ଶେଷ ହୋଇଥିଲା।ପରାହ୍ନରେ ଏହାର ଉଦଯାପନୀ ଉତ୍ସବ ଅନୁଷ୍ଠିତ ହୋଇଥିଲା, ଯେଉଁଥିରେ ଏଆଇସିଟିଇର ପୂର୍ବତନ ନିର୍ଦ୍ଦେଶକ ପ୍ରଫେସର ସଞ୍ଜୀବ କୁମାର ପଟ୍ଟନାୟକ ଯୋଗ ଦେଇଥିଲେ। ଏହି ଅବସରରେ ଶ୍ରେଷ୍ଠ ପ୍ରକଳ୍ପଗୁଡ଼ିକୁ ପୁରସ୍କୃତ କରାଯାଇଥିଲା। ଭୁବନେଶ୍ୱର ଇଞ୍ଜିନିୟରିଂ କଲେଜର ଆକାଶ କୁମାର ନାୟକ, କୃପାସିନ୍ଧୁ ମିର୍ଦ୍ଧା ଏବଂ ଓମ୍ ବିଷ୍ଣୁ ସାନ୍ୟାଙ୍କୁ ସେମାନଙ୍କ ଅଭିନବ ଉଦ୍ଭାବନ ‘ଟମାଟୋ ପାଇଁ ଜିରୋ ଏନର୍ଜି କୋଲ୍ଡ ଷ୍ଟୋରେଜ୍’ ନିମନ୍ତେ ପ୍ରଥମ ପୁରସ୍କାର ପ୍ରଦାନ କରାଯାଇଥିଲା। ଭୁବନେଶ୍ୱର ସିନର୍ଜି ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜିର ନୀଳକଣ୍ଠ ମହାରଣା ଏବଂ କମଳ ଲୋଚନ ପ୍ରଧାନଙ୍କୁ ସେମାନଙ୍କ ଅଭିନବ ଜଳସେଚନ ପ୍ରଣାଳୀ ପାଇଁ ଦ୍ୱିତୀୟ ପୁରସ୍କାର ମିଳିଥିଲା। ସେହିପରି ଗୀତମ, ଭୁବନେଶ୍ୱରର ସିଦ୍ଧାନ୍ତ ଚଳାନ, ରାକେଶ କୁମାର ବିଶ୍ୱାଳ ଓ ସୌମ୍ୟ ରଞ୍ଜନ ସାହୁଙ୍କୁ ‘ବର୍ଷା-ସୂଚନାକାରୀ ସ୍ୱୟଂଚାଳିତ ଝରକା’ ପାଇଁ ଏବଂ ଗୀତା କଲେଜର ଦେବୀ ପ୍ରସାଦ ପଣ୍ଡା, ମନୋଜ କୁମାର ସାହୁ ଓ ପ୍ରତୀକ କିରଣ ରାଉତଙ୍କୁ ସେମାନଙ୍କ କମ୍ପ୍ୟୁଟର ଅପରେଟିଂ ସିଷ୍ଟମ୍ ‘ସିନର୍ଜି ଓଏସ୍’ ପାଇଁ ଯୁଗ୍ମ ଭାବେ ତୃତୀୟ ପୁରସ୍କାର ପ୍ରଦାନ କରାଯାଇଥିଲା। ଛାତ୍ରଛାତ୍ରୀଙ୍କ ମଧ୍ୟରେ ଗଠନମୂଳକ ଚିନ୍ତାଧାରା ଏବଂ ଉଦ୍ଭାବନକୁ ପ୍ରୋତ୍ସାହିତ କରିବା ଲକ୍ଷ୍ୟରେ ଆୟୋଜିତ ଏହି ପ୍ରକଳ୍ପ ପ୍ରଦର୍ଶନୀ, ଉଦ୍ଭାବନ ଏବଂ ଉଦ୍ୟୋଗୀକରଣ କ୍ଷେତ୍ରରେ ଏକ ଶ୍ରେଷ୍ଠତା କେନ୍ଦ୍ର ଭାବରେ ଉଭା ହେବା ପାଇଁ ବିପିୟୁଟିର ଲକ୍ଷ୍ୟ ସହିତ ସମନ୍ୱିତ ହୋଇଥିଲା। ଏହି କାର୍ଯ୍ୟକ୍ରମ କେବଳ ଅଂଶଗ୍ରହଣକାରୀଙ୍କ ବୈଷୟିକ ଦକ୍ଷତାକୁ ପ୍ରଦର୍ଶିତ କରିନଥିଲା, ବରଂ ସୃଜନଶୀଳତା, ସମସ୍ୟା ସମାଧାନ କୌଶଳ ଏବଂ ସହଯୋଗୀ ଶିକ୍ଷାକୁ ବୃଦ୍ଧି କରିବା ପାଇଁ ମଧ୍ୟ ଏକ ମଞ୍ଚ ପ୍ରଦାନ କରିଥିଲା।
About the Author
