ସମ୍ବଲପୁର,୧୮/୦୩(ଉତ୍କଳ ସମାଚାର),(ସରୋଜ ସାହୁ): ସମ୍ବଲପୁର ଜିଲ୍ଲା ନାକଟିଦେଉଳ ଥାନା ଅନ୍ତର୍ଗତ ଡୁମଛାଲି ଜଙ୍ଗଲରେ ବୁଧବାର ଭୋର ସମୟରେ ପୋଲିସ ଓ ଅପରାଧୀଙ୍କ ମଧ୍ୟରେ ଗୁଳି ବିନିମୟ ହୋଇଛି I ଏହି ଏନକାଉଣ୍ଟରରେ ରାଜ୍ୟର ବିଭିନ୍ନ ଜିଲ୍ଲାରେ ଆତଙ୍କ ଖେଳାଇଥିବା ଦୁର୍ଦ୍ଦାନ୍ତ ଅପରାଧୀ ଟିମା ଝାଙ୍କର ଓରଫ ଧନେଶ୍ୱର ଝାଙ୍କର ଆହତ ହୋଇଛି। ଟିମାର ଡାହାଣ ଗୋଡ଼ରେ ଗୁଳି ବାଜିଥିବା ବେଳେ ତା’ର ୩ ଜଣ ସହଯୋଗୀଙ୍କୁ ପୋଲିସ କାବୁ କରିବାରେ ସଫଳ ହୋଇଛି। ପୋଲିସ ସୂତ୍ରରୁ ପ୍ରାପ୍ତ ସୂଚନା ଅନୁସାରେ ବୁଧବାର ସକାଳ ପ୍ରାୟ ୫.୪୫ ସମୟରେ, ନାକଟିଦେଉଳ ଥାନା ପୋଲିସ ଟିମ୍ ରେଢ଼ାଖୋଲ ଥାନା ଅଧୀନରେ ଥିବା ଡୁମଛାଲି ଜଙ୍ଗଲ ଅଞ୍ଚଳରେ ଟିମା ଓ ତା’ର ସହଯୋଗୀମାନଙ୍କୁ ଘେରି ଯାଇଥିଲେ। ପୋଲିସକୁ ଦେଖି ଅପରାଧୀମାନେ ଫେରାର ହେବାକୁ ଚେଷ୍ଟା କରିବା ସହ ପୋଲିସ ଉପରକୁ ଗୁଳି ଚାଳନା କରିଥିଲେ। ଟିମା ପକ୍ଷରୁ ୩ ରାଉଣ୍ଡ ଗୁଳି ଚାଳନା କରାଯାଇଥିଲା। ଆତ୍ମରକ୍ଷା ପାଇଁ ପୋଲିସ ପକ୍ଷରୁ ମଧ୍ୟ ପାଲଟା ୨ ରାଉଣ୍ଡ ନିୟନ୍ତ୍ରିତ ଗୁଳି ଚାଳନା କରାଯାଇଥିଲା। ଏଥିରେ ଟିମାର ଡାହାଣ ଗୋଡ଼ରେ ଗୁଳି ବାଜିଥିଲା। ଘଟଣାସ୍ଥଳରୁ ପୋଲିସ ଟିମାକୁ ଆହତ ଅବସ୍ଥାରେ ଉଦ୍ଧାର କରିବା ସହ ତା’ର ଅନ୍ୟ ୩ ସହଯୋଗୀଙ୍କୁ ଗିରଫ କରିଛି। ପୋଲିସ ଘଟଣାସ୍ଥଳରୁ ଗୋଟିଏ ପିସ୍ତଲ ଓ ଜୀବନ୍ତ ଗୁଳି, ଗୋଟିଏ ବୋଲେରୋ ଗାଡ଼ି, ବୈଦ୍ୟୁତିକ ତାର କାଟିବା ପାଇଁ ବ୍ୟବହୃତ ହେଉଥିବା ୱାୟାର କଟର ଓ ଅନ୍ୟାନ୍ୟ ଯନ୍ତ୍ରପାତି ଆଦି ସାମଗ୍ରୀ ଜବତ କରିଛି I ସୂଚନାଯୋଗ୍ୟ ଯେ, ଧନେଶ୍ୱର ଝାଙ୍କର ଓରଫ ଟିମା ନାମରେ ଓଡ଼ିଶାର ବିଭିନ୍ନ ଜିଲ୍ଲାରେ ଡକାୟତି, ରାହାଜାନି, ଆର୍ମସ୍ ଆକ୍ଟ ଏବଂ ଆଲୁମିନିୟମ କଣ୍ଡକ୍ଟର ତାର ଚୋରି ଭଳି ୪୧ରୁ ଅଧିକ ସଙ୍ଗୀନ ମାମଲା ରହିଛି। ସେ ଦୀର୍ଘ ଦିନ ଧରି ପୋଲିସ ପାଇଁ ମୁଣ୍ଡବିନ୍ଧାର କାରଣ ସାଜିଥିଲା।
About the Author
